-
Cali, Bucaramanga eta Bogotako unibertsitateetako 200 ikasle baino gehiagok ‘Study & Work in Biscay’ programa ezagutu dute, graduondoko ikasketak egin eta beraien ibilbide profesionala lurraldean garatzeko.
Kolonbiak bertatik bertara ezagutzen ditu dagoeneko Bizkaiak esparru zientifiko-teknologikoan ibilbide profesionalak garatzeko eskaintzen dituen aukera estrategikoak. Martxoko lehen astean, hiru topaketa informatibo egin dira Cali, Bucaramanga eta Bogota hirietan. Horiei esker, lurraldean graduondoko ikasketak egin eta euren lan-etorkizuna proiektatzeko interesa duten 200 unibertsitate-ikasle baino gehiagorekin harremanetan jartzeko aukera izan da.
Jardunaldi horiek Bizkaia Talent-ek antolatutako misio baten esparruan garatu dira, Bizkaiko Foru Aldundiak bultzatutako "Bizkaia with the talent" estrategiaren barruan. Ildo horretatik, bisitak egin ziren Caliko ICESI Unibertsitatera, Bucaramangako Santanderko Unibertsitate Industrialera (UIS) eta Bogotako EAN Unibertsitatera. Helburua profil potentzialak erakartzea eta Kolonbiako unibertsitateekin harreman instituzionalak sendotzea izan zen, etorkizunean talentuaren arloan lankidetza estrategikoak bultzatzeari begira.
Saio horietan, “Study & Work in Biscay” programa aurkeztu zen; STEM esparruetan trebatzeko interesa duten nazioarteko ikasleei zuzendutako ekimena da. Proiektu honen xedea talentu juniorra erakartzea da, bereziki Latinoamerikakoa, arlo tekniko estrategikoetan espezializatu eta, ondoren, lurraldeko lan-merkatuan sar dadin.
Proposamenaren oinarria ibilbide bat da, zeinak bere baitan hartzen dituen master ofizialetarako sarbidea, enpresetan ordaindutako praktika profesionalak eta, prestakuntza amaitzean, enplegu kualifikatua lortzeko aukerak.
2026-2027 ikasturterako eskaintza akademikoa UPV/EHUrekin, Deustuko Unibertsitatearekin eta Mondragon Unibertsitatearekin elkarlanean garatu da, eta hamar master ofizial jasotzen ditu honako espezialitate hauetan: Eraikuntzaren Ingeniaritza, Ingeniaritza Kimikoa, Ingurumen Kudeaketa, Sistema Elektroniko Aurreratuak, Konputazioa eta Sistema Adimendunak, Automozioaren Diseinua eta Fabrikazioa, Industria Antolakuntzaren Ingeniaritza, Negozio Adimenerako Datuen Analisia, Robotika eta Kontrol Sistemak, eta Adimen Artifizial Aplikatua.
Bidelaguntza pertsonalizatua
Informazio akademikoaz eta laboralaz gain, topaketetan lurraldean finkatzeko eman beharreko urratsei buruzko datu praktikoak eman ziren, hala nola matrikulazio-prozesuak, legezko izapideak eta Bizkairako iritsiera.
Kudeaketa horren guztiaren euskarria Welcome to Bizkaia plataforma da. Plataforma horrek ibilbide pertsonalizatu bat errazten dio bere ibilbide profesionala lurraldean jarraitzeko interesa duen pertsona bakoitzari, bere prestakuntzarako eta ondoren tokiko enpresa-sarean txertatzeko beharrezkoak diren tresnak eta bidelaguntza eskainiz.
