-
Euskalduna Jauregian egindako jardunaldian, lurraldeko enpresek euren lidergo-ereduen eraldaketan izandako esperientziak partekatu dituzte.
Bilboko Euskalduna Jauregiak ekinBarriren VIII. Urteko Ekitaldia hartu du hilabete honen hasieran. Ekimena lurraldeko enpresa-erakunde nagusiek bultzatzen dute (CEBEK, FVEM, CECOBI, ASCOBI eta AVEQ-KIMIKA), Bizkaiko Foru Aldundiaren babesarekin. “En clave de ekinBarri | ekinBarri klabean” lelopean, topaketak 120 enpresa- eta erakunde-ordezkari baino gehiago bildu zituen, lidergo partekatuak eta lantaldeen kohesioak lurraldeko enpresen lehiakortasunean duten garrantzia jorratzeko.
Topaketaren hasierako hitzaldia Guillermo Buces CEBEKeko presidentearen esku egon zen. Haren esanetan, kulturaren eraldaketa eta lidergoa garai berrietara egokitzea enpresen lehentasunak dira. Bere hitzaldian, pertsonen eta lantaldeen kohesioaren garrantzia nabarmendu zuen enpresen lehiakortasunerako, baita ekinBarrik alderdi horiek lantzeko metodologia objektiboak eskaintzen egindako ekarpena ere.
Jardunaldian Lluís Soldevila ingeniariak, ESADEko irakasleak eta Deutsche Bankeko zuzendari ohiak, “Que el compás te acompañe: lecciones maestras para el futuro de las organizaciones” izeneko hitzaldia eskaini zuen. Yoda hari gidari hartuta, hamar ideiaren bidez lidergo-eredu bat aurkeztu zuen: taldeak bideratzen, haien ekarpenak entzuten eta erabakiak hartzeko autonomia ematen dakiena, baita akatsetatik ikasten uzten duena ere.
Benetako kasuak eta 2026ko ekinBarri Saria
Topaketak Galdakaoko bi enpresaren eraldaketa-esperientziak ezagutzeko aukera ere eman zuen, “Acordes ekinBarri: experiencias empresariales” saioan. Alde batetik, GHI Smart Furnacesek ekinBarri metodologia pixkanaka ezartzeko prozesua azaldu du: zuzendaritza-batzordetik hasi, tarteko agintaritzetara hedatu eta erakunde osora iritsi arte. Helburua taldeak erronka hauen aurrean lerrokatzea izan da: deskarbonizazioa, birziklapena eta adimen artifizialaren bidezko digitalizazioa.
Construcciones Zamakoak, bestalde, zuzendaritzaren intuizioan oinarritutako kudeaketatik datuak eta neurketa-tresnak erabiltzera egindako bidea azaldu zuen, ekinBarriTECH teknologiaren eta lidergo parte-hartzaileko ohitura berrien bidez.
Ekitaldian, halaber, ekinBarri 2026 saria Aurubis Berangori eman zioten. 1992an sortutako lantegia 2020tik dago Aurubis nazioarteko taldean integratuta, eta kobrea ekoizten eta birziklatzen du. ekinBarrirekiko eta Bizkaiarekiko konpromisoagatik jaso zuen aintzatespena.

