-
‘Bizkaia with the talent’ ekimenari atxikita, programak lurraldeko enpresa txiki eta ertainen eta LHko ikastetxeen arteko harremanak estutzeko zerbitzua diseinatzea du helburu, lan-merkatuan sartzeko benetako aukerak sortzeko
Talentu kualifikatua lortzea erronka handia da askotan enpresentzat. Egoera are larriagoa da enpresa txiki eta ertainen (ETE) kasuan, konpainia handiek baino askoz ere baliabide gutxiago baitituzte profesionalak erakarri eta atxikitzeko. Lanbide Heziketan trebatutako talentuak premia horri aurre egiten lagun dezake, baina ETEek ez dute beti lortzen lotura arinak ezartzea prestakuntza dualean dauden ikasleekin, eta horrek zaildu egiten du ekoizpen-sarean sartzea.
Arazo horri erantzuteko sortu da BATU, Bizkaiko Foru Aldundiak eta Ikaslan Bizkaia eta Hetel-eko ikastetxeek bultzatutako “Bizkaia with the talent” ekimenaren barruko proiektua. Bere helburu nagusia Lanbide Heziketa Dualaren eta lurraldeko ETEen arteko harremanak estutzea da, LHko ikasleak, eta bereziki STEM zikloetakoak, tokiko lan-merkatura sartu ahal daitezen, enpresei behar dituzten profil teknikoak aurkitzeko aukera erraztuz.
Horretarako, BATUk parte-hartze bidezko kodiseinua du oinarri, Bizkaiko ETEak, LHko ikastetxeetako prestakuntza-arduradunak eta prestakuntza dualeko ikasleak barne hartuta. Lan honetatik abiatuta, hobeto elkar ezagutzeko eta lan-merkaturako benetako sarbide-aukerak sortzeko zerbitzua eratu nahi da. Ikuspegi honi esker, prestakuntza-eskaintza enpresa-sarearen beharretara egokitu ahal da, prestakuntza jasotzen dutenen eta lan-taldeetan talentua sartu nahi dutenen arteko harremanak sendotuz.
Aurten, programa pilotua egiten ari den bitartean, lan-merkatuaren beharretara egokitutako eredua eraikitzea espero da, talentu gazteak Bizkaian garapen profesionalerako benetako aukerak izatea bermatuz.
